1870. urtean Laudioko Haraneko Eskola Publikoak eratu zirenetik gaur egun Laudioalde Lanbide Eskola eratu arte, gure instalazioak 150 urte baino gehiagoz egon dira etenik gabe hezkuntza-lanetan.

Mende eta erdi honetan zehar, hainbat garaitako gazteek beren ametsak betetzeko laguntza aurkitu dute prestakuntzan.

60ko eta 70eko hamarkadetako garapen ekonomikoarekin, erakunde titularrek uste zuten beharrezkoa zela eskolako lanbide-heziketarako ikuspegia indartzea eta eskualdeko industria-sarean laguntzea. 1972az geroztik, Laudioko Udalaren eta La Salle erakundearen titulartasunpean zuzendaritza pedagogikoa eramanez, Udal Ikastetxea Batxilergoko eta LHko ikastetxe gisa eratzen da.

2017ko urtarrilaren 1etik, ikastetxea sare publikoan sartzen da, eta Eusko Jaurlaritzako Hezkuntza Sailaren mende geratzen da, IES Laudioalde Lanbide Eskola BHI izenarekin.

Ikastetxeko Lanbide Heziketa Arautua lau mailatan antolatuta dago: Oinarrizko Mailako Heziketa Zikloak, Erdi Mailako Heziketa Zikloak, Goi Mailako Heziketa Zikloak eta Espezializazio Ikastaroak. Irakaskuntza horiek, era berean, hainbat motatako lanbide-moduluetan egituratzen dira (jakintzagaiak edo irakasgaiak dira): konpetentzia-atalei lotutakoak, zeharkakoak, Laneko Prestakuntza eta Orientabidea, Enpresa eta ekimen sortzailea, eta Lantokiko Prestakuntza (LP).

Gure lan-arloek familia hauek biltzen dituzte:

Fabrikazio mekanikoa

Elektrizitatea eta elektronika

Instalazioa eta mantentze-lanak

Administrazioa eta finantzak

Laudioalde TKguneren parte da, hau da, Lanbide Heziketan metatutako azpiegitura eta ezagutza guztia Euskal Autonomia Erkidegoko ETE guztien eskura jartzen duen LHko zentroen sarearen parte. Berrikuntzarako laguntza, prestakuntza aurreratua eta berrikuntzako eta hobekuntzako zerbitzu teknikoak dira TKguneren bidez ematen diren zerbitzuak.