Ikasturte-hasiera bakoitzean ohikoa denez, TKgune Sarea bildu egiten da programako lantaldeak ezagutzeko eta haiekin elkarreragiteko, hainbat dinamikatan parte hartzeko eta sinergiak sortzeko, Euskal Autonomia Erkidegoko ETEetan proiektu berritzaileak sortzea ahalbidetzeko.
Joan den urriaren 7an, TKgune sareko ikasturte hasierako bilera orokorra egin genuen Zornotza LHII ikastetxean. Programan parte hartzen duten ikastetxeetako koordinatzaileek hartu zuten parte bileran.
2026-2027 ikasturtean, 57 ikastetxe publikok eta itunpekok osatuko dute TKgune sarea, aurten sartutako bost ikastetxe berriak barne.
Aurreko ikasturteko emaitzak eta Plan Estrategikoaren helburuak abiapuntutzat hartuta, ikasturte honetarako Urteko Plana aurkeztu genuen, Lanbide Heziketako ikastetxeen eta enpresen arteko lankidetza-proiektuak sustatzen jarraitzeko helburuarekin.
Jardunaldian, bi talde-dinamika egin genituen koordinatzaileen beharrak eta interesak ezagutzeko, enpresekin lankidetzan TKgune proiektuak identifikatu, garatu eta sendotzeko.
Dinamika horiei esker, eskualde mailako eta interes komuneko gai berritzaileei buruzko lankidetza-saioetarako oinarriak ezarri ziren.
Bestalde, bilera orokorra baino astebete lehenago, TKgune koordinatzaile berrientzako prestakuntza-saio bat antolatu genuen.
Saio horretan, TKgune programa zertan datzan jakiteko eta helburuak ezagutzeko aukera izan zuten; proiektuen adibideak ikusi zituzten, lan egiteko metodologia ikasi zuten eta TKgune aplikazioan datuak erregistratzeko aplikazioa ezagutu zuten.
Tknikatik, eskerrak eman nahi dizkiegu parte-hartzaile guztiei, erakutsitako inplikazioagatik eta jardunaldietan sortutako giro onagatik. Topaketa hauek ikastetxeen arteko lankidetza-harremanak sendotzeko eta enpresekin batera balio erantsiko proiektu berriak garatzen jarraitzeko baliagarriak dira.
